Kreu i FRD-së, Bamir Topi ka deklaruar sot se ka respekt për kauzën e opozitës por do jetë pjesë e proçesit zgjedhor në 18 qershor, ndërsa ka përshkruar me shqetësim situatën aktuale politike në vend.
Sipas tij, termat “qeveri teknike” e “qeveri besimi” të lakuara së fundmi i ka dëgjuar, por vetëm besim mes tyre nuk ka.
“I kam dëgjuar termat “qeveri teknike” e “qeveri besimi”. Mendoj se është çështje emërtimi, por ajo që nuk konstatoj sot në asnjë element të kësaj marrëdhënie është besimi, nuk e shikoj besimin askund. Kredibiliteti ka rënë mes mazhorancës e opozitës, brenda mazhorancës, brenda kuvendit dhe presidencës, qeverisë, komisioneve parlamentare etj.. Kam respekt për kauzën e opozitës dhe kërkojmë reformimin e Kodit Zgjedhor”, është shprehur Topi në një konferencë për mediat.
Topi shtoi se zgjidhjen e situatës e pret nga institucionet e Shqipërisë dhe jo vetëm me ndërmjetësimin e faktorit ndërkombëtar. “Jemi bërë gazi i botës”, tha kreu i FRD-së, lidhur me këtë çështje.